Zyra për Kosovën në Qeverinë e Serbisë ka bërë të ditur se autoritetet e Kosovës e kanë refuzuar një kërkesë për vizitë nga Ministri pa Portofol i kësaj Qeverie, Aleksandar Vulin.

Bashkë me të ne Kosovë ka qenë dashur të vijë edhe Ministri për Rini dhe Sport, Vanja Udovcic.

Në një komunikatë të kësaj zyre thuhet se “kësaj radhe, Serbia është penguar që t’u ndihmojë studentëve më të mirë në Kosovë për t’i zgjeruar njohuritë dhe talentet e tyre”.

Zyra për Kosovën në Qeverinë e Serbisë ka kërkuar nga organet kompetente dhe komuniteti ndërkombëtar që ta ndalin “diskriminimin e Prishtinës ndaj studentëve në baza kombëtare”.

Sipas Beogradit, me këtë ndalesë, është shkelur e drejta për arsimim e të gjithë studentëve serbë të Universitetit të Prishtinës me seli në Mitrovicën e Veriut.

Vulin dhe Udovcic kishin planifikuar ta vizitonin këtë Universitet për të shpërndarë grante për gjashtë studentët më të mirë në vitin e fundit të studimeve.

Ministrit pa Portofol në Qeverinë e Serbisë, Aleksandar Vulin do t’i ndalohet hyrja në Kosovë, në vizitën që ai ka paraparë që ta realizojë këtë të enjte (nesër).

Tanjug raporton se këtë lajm ia kanë konfirmuar burimet si brenda EULEX’it ashtu edhe nga Qeveria e Kosovës.

Siç është raportuar më herët nga Zyra për Kosovë dhe Metohi e Qeverisë së Serbisë, nesër Vulin është dashur që qëndrojë në Kosovë bashkë me Ministrin për Energji në Qeverinë Serbe Zoran Mihajlovic për për ta vizituar kompaninë publike energjetike dhe disa institucione lokale të mbështetura nga Serbia në Kosovë.

Në EULEX thonë se nuk dinë se çka do të ndodhë me kërkesën e Ministrit Mihajlovic për ta vizituar Kosovën.

Vulin para tri ditësh ka qëndruar në Kllokot ku u ka bërë thirrje serbëve lokalë që të votojnë për Iniciativën Qytetare Serbe, në kunërshtim me atë që Kryeministrat Hashim Thaci dhe Ivica Dacic janë marrë vesh në Bruksel.

Komentet e Vulin janë kritikuar edhe nga lideri i serbëve të Kosovës, ministët në Qeverinë e Kosovës, Nenad Rasic, në një intervistë për lajmi.net.