Një person ka humbur jetën mbrëmjen e së hënës në fshatin Zlipotok të Dragashit, pasi dyshohet se u godit me një mjet të mprehtë gjatë një rrahjeje.

Sipas raportit 24-orësh të Policisë së Kosovës, rasti ka ndodhur më 29 qershor, rreth orës 23:15, kur është raportuar për një përleshje mes disa personave, transmeton lajmi.net.

Gjatë incidentit, viktima, mashkull kosovar, dyshohet se ka pësuar lëndime nga një mjet i mprehtë. Ai është dërguar për trajtim mjekësor në Qendrën Kryesore të Mjekësisë Familjare (QKMF) në Dragash, ku mjeku kujdestar ka konstatuar vdekjen e tij.

Policia bën të ditur se i dyshuari për rastin, mashkull kosovar, është identifikuar, por ndodhet në arrati.

Rasti është cilësuar si “Vrasje e rëndë”, ndërsa hetimet për zbardhjen e plotë të ngjarjes dhe kapjen e të dyshuarit janë në vazhdim.

Raporti i plotë:

VRASJE E RËNDË

Fsh. Zlipotok, Dragash 29.06.2026, 23:15. Është raportuar se ka ndodhur një rrahje në mes disa personave, si pasojë e kësaj viktima mashkull kosovar, dyshohet se ka marr lëndime nga një mjet i mprehtë dhe i njëjti është dërguar për tretman mjekësor në QKMF-Dragash,  ku mjeku kujdestar ka konstatuar vdekjen e viktimës, ndërsa i dyshuari mashkull kosovar gjendet në arrati./lajmi.net/