Pas Hanit të Elezit, Shtërpcës, Parteshit, Ranillugut, Junikut, edhe në Kllokot ka përfunduar numërimi i votave për kandidatët për deputetë në qendrën komunale të numërimit, ka njoftuar Komisioni Qendror i Zgjedhjeve të shtunën.

Ndërkohë, ky proces është duke vazhduar në 28 komuna të tjera.

Në Leposaviq, Zveçan, Zubin Potok dhe Mamushë ende nuk ka filluar numërimi.

Në qendra komunale të numërimit do të bëhet edhe verifikimi i votave për subjektet politike.

Nga KQZ-ja është paralajmëruar se numërimi i votave nuk do të përfundojë së paku edhe 10 ditë, raporton RTK.

Ky proces është shoqëruar me shumë probleme që nga dita kur përfunduan zgjedhjet. Gjatë këtij procesi, komisionerët e KQZ janë ballafaquar me probleme të vazhdueshme me sistemin e regjistrimit të rezultateve.

Kryetari i këtij institucioni, Kreshnik Radoniqi, ka thënë se po presin raportin e institucioneve të sigurisë për të kuptuar më shumë rreth asaj që ka ndodhur me sistemin e KQZ-së.