Zëvendës Kryeministrja e Kosovës, Edita Tahiri, ka thënë se afati i inaugurimit të asambleve të katër komunave veriore të Kosovës skadon të dielën, më 12 janar.

Tahiri, e cila është edhe Udhëheqëse e delegacionit të Kosovës në bisedimet teknike me serbinë që po zhvillohen në Bruksel, është shprehur se Kryetarët e Komunave Mitrovicë e Veriut, Zveçan, Zubin Potok dhe Leposaviq e kanë të qartë se ky proces duhet të bëhet sipas ligjeve të Kosovës.

“12 janari është data e fundit për inaugurimin e organeve të reja komunale për komunat të cilat tashmë i kanë shtyrë inaugurimet” , ka thënë Tahiri në intervistën për “Epokën e Re”.

“Qeveria e Republikës së Kosovës i ka dhënë të gjitha udhëzimet për t’i respektuar ligjet e Kosovës në procesin e konstituimit të komunave, por edhe në funksionimin e tyre”.

“Po ashtu, ua kemi bërë të qartë se edhe marrëveshja e Brukselit e nënvizon qartë, se procesi i zgjedhjeve dhe i funksionimit të komunave bëhet sipas ligjeve të Republikës së Kosovës. Andaj të gjithë kryetarët e komunave dhe të tjerët që janë zgjedhur e kanë për obligim t’i respektojnë ligjet e Republikës së Kosovës”.

Tahiri ka thënë se nëse nuk bëhet inaugurimi dhe konstituimi i kuvendeve komunale në veri deri më 12 janar, institucionet e Kosovës do të veprojnë konform Kushtetutës.

“Nëse ata nuk i respektojnë ligjet e Kosovës nuk do të pranohen si struktura legale komunale”.

Zëvendëskryeministrja Edita Tahiri ka kërkuar nga kryetarët e rinj ta marrin seriozisht mesazhin e Bashkimit Europian karshi inaugurimit të kuvendeve komunale në Veri.

Tahiri u është përgjigjur edhe akuzave të opozitës se dialogu në Bruksel ka degraduar. Ajo ka thënë se dialogu në mes të Kosovës dhe Serbisë është duke dhënë rezultate.