Vdekja e punëtorit në Vushtrri, policia e ndalon për 48 orë një person të dyshuar

Lajme

21/05/2026 19:39

Policia e Kosovës ka ndaluar një person në lidhje me rastin e vdekjes së një punëtori në një objekt ndërtimi në Vushtrri.

Hetuesit policorë të Sektorit Rajonal të Hetimeve, në koordinim me prokurorin, kanë ndërmarrë veprime hetimore, duke intervistuar pesë persona në cilësinë e dëshmitarëve. Një person tjetër, i dyshuar për rastin, është intervistuar në prani të avokatit mbrojtës, transmeton lajmi.net.

Pas intervistimit, prokurori kujdestar ka nxjerrë aktvendim për ndalimin e të dyshuarit për 48 orë. Hetimet vazhdojnë për zbardhjen e plotë të rrethanave që çuan në ngjarjen tragjike.

Ngjarja ndodhi sot rreth orës 13:00, kur punëtori 31-vjeçar ra nga një kat i lartë në një objekt ndërtimi dhe pavarësisht përpjekjeve për t’u shpëtuar, ai nuk arriti t’i mbijetojë lëndimeve. Trupi i tij është dërguar për obduksion në Institutin e Mjekësisë Ligjore, ndërsa prokurori ka inicuar hetimet për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Komunikata e plotë:

Ndalohet një person në lidhje në me rastin e vdekjes së një personi në vendin e punës

Vushtrri, 21 maj 2026

Hetuesit policorë të Sektorit Rajonal të Hetimeve në koordinim me prokurorin kanë ndërmarrë veprime hetimore lidhur me rastin ku janë intervistuar pesë (5) persona në cilësinë e dëshmitarëve, ndërsa në prani të avokatit mbrojtës është intervistuar edhe një person i dyshuar.

Pas intervistimit, është njoftuar prokurori kujdestar, i cili ka nxjerrë aktvendim për ndalimin e të dyshuarit për 48 orë.

—

Humb jetën një person i cili bie nga një objekt në ndërtim në Vushtrri

Vushtrri, 21 maj 2026

Sot rreth orës 13:00, policia në Vushtrri është njoftuar se nga një kat i lartë në një objekt në ndërtimi ka rënë një punëtor në rrethana ende te panjohura. Ai është dërguar me autoambulancë në repartin e emergjencës në spitalin e qytetit në Vushtrri, mirëpo nuk ka arritur t’u mbijetojë lëndimeve të pësuara ndërsa vdekjen e ka konfirmuar mjeku kujdestar.

Në vendin e ngjarjes kanë dalë njësitë përkatëse policore, inspektorët komunal si dhe inspektorët e punës. Pas përfundimit të shikimit të vendit të ngjarjes është kontaktuar prokurori për krime të rënda i cili ka urdhëruar inicimin e rastit për veprën penale; ,,Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Me urdhër të prokurorit trupi i pajetë i viktimës mashkull, i moshë 31 vjeçare, është dërguar për obduksion në Institutin e Mjekësisë Ligjore.

Hetimet do të vazhdojnë për ndriçimin e plotë të rrethanave të rastit./lajmi.net/