Tensionet në Siri janë thelluar më tej pas një sulmi ajror të Izraelit pranë pallatit presidencial në Damask.Lajmin e konfirmoi vetë kryeministri izraelit, Benjamin Netanyahu, të premten në mëngjes i cili tha se veprimi ishte një mesazh i qartë ndaj regjimit sirian, në mbrojtje të komunitetit Druze.

“Izraeli sulmoi mbrëmë pranë pallatit presidencial në Damask,” tha Netanyahu në një deklaratë të përbashkët me Ministrin e Mbrojtjes, Israel Katz.

“Ky është një mesazh i qartë për regjimin sirian, ne nuk do të lejojmë vendosjen e forcave në jug të Damaskut ose ndonjë kërcënim për komunitetin Druze.”

Ky është sulmi i dytë i Izraelit në dy ditët e fundit në territorin sirian, në kohën kur përplasjet sektare midis grupeve të armatosura druze dhe sunite janë përshkallëzuar.

Ushtria izraelite bëri të ditur se operacioni u zhvillua “pranë zonës së pallatit të Ahmed Hussein al-Shara në Damask”, por pa specifikuar objektivin e saktë.

Goditja ndodhi rreth 500 metra larg pallatit presidencial, dhe se Presidenti i përkohshëm Sharaa, së bashku me zyrtarë të tjerë, kishin lënë ndërtesën një orë para sulmit.

Qeveria siriane nuk ka dhënë ende ndonjë reagim zyrtar.