Presidenti Donald Trump tha të mërkurën se nuk beson që lideri suprem iranian, Mojtaba Khamenei, ka vdekur, mes spekulimeve për vendndodhjen dhe gjendjen e tij, pothuajse gjashtë muaj pas emërimit të tij.

“Nuk mendoj se ka vdekur”, i tha Trump drejtuesit konservator të radios Glenn Beck gjatë një interviste telefonike të drejtpërdrejtë, shkruan CNN.

“Ai u plagos shumë rëndë”, shtoi Trump. “Ana e majtë e trupit të tij, krahu, këmba, gjithçka. Ai u plagos shumë rëndë. Por nuk mendoj se ka vdekur”.

Trump sugjeroi se, nëse Khamenei ka vdekur, zyrtarët iranianë kanë ruajtur paraqitjen se ai është gjallë – ai tha se ata vazhdojnë të konsultohen me të dhe të kërkojnë “bekimin e tij përfundimtar” për çështje të rëndësishme. Ai shtoi se negociatorët iranianë “nuk janë grupi më i ndershëm”, duke lënë të kuptohet se gjithçka është e mundur.

I pyetur për mundësinë e fitores në luftë, Trump tha: “Fuqia jonë financiare është e pabesueshme dhe këto gjëra po shkojnë drejt një fitoreje shumë të madhe”.

Në fillim të kësaj jave, Departamenti amerikan i Thesarit njoftoi një fushatë për ashpërsimin e sanksioneve ndaj Iranit, duke kërcënuar me pasoja ekonomike ndaj vendeve që refuzojnë të ndërpresin lidhjet me Iranin.