Shtetet e Bashkuara kanë shpallur një paketë të re sanksionesh që synon dy kompanitë më të mëdha të naftës në Rusi, në përpjekje për të rritur presionin ndaj Moskës që të pranojë negociata për paqe në Ukrainë.

Vendimi u bë publik një ditë pasi presidenti amerikan, Donald Trump, njoftoi se takimi i planifikuar me homologun rus, Vladimir Putin, në Budapest do të shtyhej për një afat të pacaktuar, transmeton lajmi.net.

“Sa herë që flas me Vladimirin, kemi biseda të mira, por ato nuk çojnë askund,” deklaroi Trump.

Edhe pse ndikimi ekonomik në ekonominë ruse pritet të jetë i kufizuar, ky veprim shënon një ndryshim të dukshëm në qasjen e politikës së jashtme të presidentit amerikan, i cili më parë kishte theksuar se nuk do të vendoste sanksione të reja pa ndërmarrë hapa të ngjashëm nga vendet evropiane për ndalimin e importit të naftës ruse. Nga ana e saj, Moska reagoi duke thënë se Rusia është “imune” ndaj sanksioneve.

Ky zhvillim vjen pak ditë pas vendimit të Mbretërisë së Bashkuar për të vendosur masa të ngjashme ndaj të njëjtave kompani, ndërsa Bashkimi Evropian ka miratuar një paketë të re që parashikon ndalimin e importit të gazit natyror të lëngshëm rus duke filluar nga janari 2027.

Trump kishte paralajmëruar disa herë për masa më të ashpra ndaj Rusisë, por deri tani kishte shmangur një hap të tillë, me shpresën për të ndërmjetësuar një marrëveshje paqeje që do t’i jepte fund luftës tre vjet e gjysmë të gjatë në Ukrainë.

Megjithatë, burime pranë Shtëpisë së Bardhë bëjnë të ditur se presidenti është bërë gjithnjë e më i zhgënjyer me Kremlinin për mungesën e progresit në bisedimet për paqe./lajmi.net/