Nëpërmjet një postimi në Facebook, Thaçi ka përmendur presidentin e Izraelit, Shimon Perez, i cili këto ditë të fundit  ka përfunduar mandatin e tij presidencial,  duke thënë se ai ishte “përkrahës i pashoq” i pavarësisë së Kosovës.

“Këto ditë përfundoi mandatin presidencial një nga veteranët e politikës dhe paqe-bërjes globale, Presidenti Shimon Peres. U bë president i Izraelit më 2007, kur edhe u takova me të gjatë një vizite qe e bëra në Jerusalem dhe Tel-Aviv, me ftesë të shtetit izraelit. Nobelisti Peres edhe në atë kohë ishte përkrahës i pashoq i pavarësimit të Kosovës dhe shpesh ka spikatur publikisht pro-amerikanizmin e përbashkët të shqiptarëve dhe hebrenjve”.

“E mbaj në mend historinë e tij për shtet-ndërtim dhe paqe përkundër faktit që familja e tij në Poloni ishte zhdukur në Holokaust – krimin e pashoq në historinë moderne të njerëzimit”.

“Edhe tek sa lutemi për paqe në Lindjen e Mesme, Kosova duhet të ketë kujdes t’i çmojë kontribuuesit e lirisë dhe pavarësisë sonë nga populli hebre si presidenti Peres, kongresmeni i ndjerë Tom Lantos, ish-sekretarja e Shtetit, Madeleine K. Albright, kongresmeni Eliot Engel, senatori Charles Chuck Schumer e dhjetëra përfaqësues tjerë të popullit hebre”, ka shkruar Thaçi në Facebook.