Tre ditë pas fillimit të protestave në Shkup kundër dënimit të përjetshëm ndaj të akuzuarve për rastin “Monstra”, të cilat u përfshinë edhe në pjesë tjera të Maqedonisë, ka ardhur reagimi i Kryeministrit të Kosovës Hashim Thaçi-t.

Përmes një deklarate të lëshuar nga zyra e Kryeministrisë së Kosovës, kërkohet dialog mes palëve në Maqedoni për tejkalimin e problemeve.

Sipas deklaratës së Qeverisë, Marrëveshja e Ohrit duhet të zbatohet me përpikëri për të shmangur dhunën ndër etnike.

Lexojeni të plotë deklaratën e Qeverisë:

Qeveria e Republikës së Kosovës është duke përcjellë me vëmendje zhvillimet e fundit në Republikën e Maqedonisë, si rrjedhojë e aktgjykimeve ndaj të akuzuarve në rastin “Monstra” dhe protestave qytetare, që pasuan si reagim ndaj aktgjykimeve.

Me këtë rast, Qeveria e Republikës së Kosovës rithekson se dialogu politik ndërmjet komuniteteve dhe zbatimi në përpikëri i Marrëveshjes së Ohrit është rruga e vetme e zgjidhjes së çështjeve të hapura midis komuniteteve në Maqedoni. Respektimi i të drejtave fundamentale kushtetuese dhe institucionale është mënyra e vetme për të evituar eskalimin e dhunës, që do të mund të përcillej me pasoja të rënda për tërë rajonin.

Republika e Kosovës është e përkushtuar në procesin e integrimeve euro-atlantike dhe bashkëpunimit rajonal dhe thërret të gjitha palët në Republikën e Maqedonisë që të përmbahen nga dhuna si mjet i zgjidhjes së çështjeve politike.

Populli shqiptar në Maqedoni ka përfaqësuesit e vetë zgjedhur në mënyrë demokratike, të cilët e kanë për obligim që t’i adresojnë në mënyrë institucionale problemet dhe shqetësimet e popullatës shqiptare.

Qeveria e Republikës së Kosovës edhe një herë u bën thirrje të gjitha palëve të përfshira për maturi dhe gjetje të zgjidhjes përmes dialogut të ndërsjellë.