Të premten në Kosovë do të mbajë mot me diell dhe vranësira të ndryshueshme, ndërsa gjatë ditës pritet shtim i vranësirave, të cilat në disa zona mund të shoqërohen me reshje shiu.

Sipas parashikimit të Institutit Hidrometeorologjik të Kosovës (IHMK), temperaturat minimale do të lëvizin nga 4 deri në 9 gradë Celsius, ndërsa ato maksimale do të arrijnë nga 14 deri në 17 gradë Celsius, transmeton lajmi.net.

Era do të fryjë nga drejtimi i veriperëndimit, me shpejtësi prej 1 deri në 5 metra në sekondë.

Sa i përket kushteve biometeorologjike, ato pritet të jenë përgjithësisht të favorshme për shumicën e popullatës. Megjithatë, lagështia e shtuar gjatë periudhave me vranësira dhe reshje mund të ndikojë te personat e ndjeshëm ndaj ndryshimeve të motit.

Ndërkaq, kushtet agrometeorologjike pritet të jenë përgjithësisht të përshtatshme për aktivitetet bujqësore sezonale, ndërsa rekomandohet që punët në bujqësi të planifikohen duke marrë parasysh reshjet e mundshme dhe temperaturat e mëngjesit./lajmi.net/