Brendan Rodgers beson se Luis Suarez është në gjendje ta thyejë rekordin individual prej 34 golave në Premierligë brenda një sezoni, nëse vazhdon me serinë e tanishme të shënimeve.

I freskët pas vazhdimit të kontratës, Suarez ia prezantoi Anfield Roadit një tjetër paraqitje të shkëlqyeshme duke shënuar dy herë në fitoren 3:1 ndaj Cardiffit të shtunën me çka u ngrit në kuotën e 19 golave.

Andy Cole (1993-94) dhe Alan Shearer (1994-95) e ndajnë rekordin me nga 34 gola secili, por ata e arritën këtë në kohën kur një stinor në Premierligë kishte 42 ndeshje. Shearer (1995-96) dhe Cristiano Ronaldo (2007-08) e vendosën nivelin me 31 gola në edicionin me 38 ndeshje.

Por, menaxheri i Liverpoolit, Rodgers beson se Suarez mund t’i tejkalojë ata. “Ai duket se mund të shënojë het-trik në çdo ndeshje, apo jo? Ai mund ta thyejë rekordin sepse ka atë që nevojitet. Ai pa dyshim se do të jetë shumë afër”, deklaroi Rodgers.