Sindikata e Re e KEK-ut ka reaguar ashpër pas rasteve të vdekjeve të punëtorëve në vendin e punës, duke kërkuar përgjegjësi nga menaxhmenti dhe rritje të masave të sigurisë në ndërmarrje.

Në reagimin e saj, sindikata ngre shqetësimin se brenda shtatë muajve kanë humbur jetën katër punëtorë të KEK-ut dhe pyet pse, sipas saj, nuk ka pasur asnjë dorëheqje morale nga përgjegjësit, transmeton lajmi.net.

“Si është e mundur që për 7 muaj të kemi 4 punëtorë të vdekur në vendin e punës dhe të mos ketë asnjë dorëheqje morale?”, thuhet në reagim.

Sindikata kritikon edhe menaxhmentin për mënyrën se si, sipas saj, po trajtohet çështja e sigurisë në vendin e punës, duke pretenduar se disa drejtues janë më të fokusuar në ruajtjen e pozitave të tyre sesa në sigurinë e punëtorëve.

Në reagim pretendohet gjithashtu se mjete të konsiderueshme financiare shpenzohen për këshilltarë të jashtëm dhe përdorimin e automjeteve zyrtare pas orarit të punës.

“Vetëm paratë e shpenzuara për këshilltarë të jashtëm dhe për derivate nga përdorimi i automjeteve zyrtare pas orarit të punës do të mund të mjaftonin për blerjen e pajisjeve mbrojtëse dhe për rritjen e sigurisë në vendin e punës”, deklaron Sindikata e Re e KEK-ut.

Sindikata ka vlerësuar pozitivisht dorëheqjet e disa menaxherëve që, sipas saj, kanë kuptuar se nuk kanë pasur mundësi të garantojnë sigurinë e punëtorëve.

Në fund, Sindikata e Re e KEK-ut kërkon që siguria në vendin e punës të trajtohet si prioritet i përhershëm dhe jo vetëm pas ndodhjes së tragjedive.

“Siguria në KEK duhet të jetë prioriteti numër një, jo vetëm pas një tragjedie, por çdo ditë që një punëtor hyn dhe del nga vendi i punës”, thuhet në reagimin e nënshkruar nga kryetari i Sindikatës së Re të KEK-ut, Xhelal Jashari.

Postimi:

TURPI SPASKA FUND

MENAXHIM PA NDJENJA

Të humbasësh një koleg në frontin e punës është njësoj si të humbasësh një bashkëluftëtar në betejë. Dhimbja është e madhe, sepse nuk humbëm vetëm një punëtor, por një njeri, një koleg dhe një pjesëtar të familjes së madhe të KEK-ut.

Por përtej dhimbjes, shtrohet një pyetje që nuk mund të heshtet më:

Si është e mundur që për 7 muaj të kemi 4 punëtorë të vdekur në vendin e punës dhe të mos ketë asnjë dorëheqje morale?

Disa drejtorë e menaxherë duket se janë bërë “lëpirës të një page”, duke punuar me frikën se mos e humbin postin. Por posti nuk është gjithçka! Paga dhe karrigia nuk mund të jenë më të rëndësishme se jeta e një punëtori.

Pashë Zotin, a nuk ju vjen turp?

A mendoni se punëtorët janë patate apo fije bari, që ju t’i plotësoni egot tuaja me paga të majme dhe vetura deri në 50 mijë euro, të cilat i përdorni edhe pas orarit të punës për në shtëpitë tuaja?

Vetëm paratë e shpenzuara për këshilltarë të jashtëm dhe për derivate nga përdorimi i automjeteve zyrtare pas orarit të punës do të mund të mjaftonin për blerjen e pajisjeve mbrojtëse dhe për rritjen e sigurisë në vendin e punës.

JO MË!

Nuk do t’i përmbushni më egot tuaja në kurriz të djersës, mundit dhe jetës së punëtorëve.

Punëtorët kanë familje. Në fund të ditës ata duan të kthehen të gjallë te fëmijët, bashkëshortet, prindërit dhe familjet e tyre.

Turpi dhe marrja, spaskan  fund!

Prandaj, BRAVO atyre menaxherëve që kanë dhënë dorëheqje, kur kanë parë se nuk kanë pasur kushtet për të garantuar punën dhe sigurinë e punëtorëve.

Sot, të paktën, ata janë me faqe të bardhë.

Jeta e punëtorit duhet të jetë mbi çdo post, mbi çdo pagë dhe mbi çdo interes personal.

MJAFT MË ME HESHTJE!

Siguria në KEK duhet të jetë prioriteti numër një, jo vetëm pas një tragjedie, por çdo ditë që një punëtor hyn dhe del nga vendi i punës.

Sindikata e Re e KEK-ut

Xhelal Jashari

Kryetar./lajmi.net/