Sindakata e Policisë së Kosovës (SPK) ka shprehur ngushëllime për ndarjen nga jeta të zyrtarit policor Altin Kryeziu, i cili humbi jetën pas plagëve të marra në një aksident të ndodhur në krye të detyrës.

Përmes një telegrami ngushëllimi, SPK ka ndarë dhimbjen me familjen e Kryeziut, të afërmit, miqtë, kolegët dhe të gjithë pjesëtarët e Policisë së Kosovës.

“Në këto çaste të dhimbjes së thellë, shprehim respektin tonë për jetën dhe kontributin e të ndjerit në shërbim të qytetarëve dhe në përmbushjen e detyrës zyrtare, duke ndarë dhimbjen me familjen dhe kolegët e tij për këtë humbje të rëndë”, thuhet në telegram.

Sindakata e Policisë ka vlerësuar kontributin e Kryeziut në shërbim të qytetarëve, duke e përmbyllur mesazhin me fjalët:

“I paharruar qoftë kujtimi për të ndjerin Altin Kryeziu”. /Lajmi.net/