Të premten, më 12 dhjetor, ishte paraparë të mbahej seanca e radhës për rastin e vrasjes së Liridona Ademajt, në të cilën të akuzuar janë ish-bashkëshorti i saj Naim Murseli, si dhe Granit Plava e Kushtrim Kokalla.

Me vendim të Gjykatës Themelore në Prishtinë, seanca është shtyrë për datën 22 dhjetor 2025, duke filluar nga ora 09:30 – kështu ka bërë të ditur për Lajmi.net zëdhënësja e Gjykatës, Mirlinda Gashi.

“Ju njoftojmë se seanca e shqyrtimit gjyqësor në çështjen penale ndaj të akuzuarve N.M., G.P. dhe K.K., për shkak të veprës penale Vrasje e Rëndë e caktuar për datë 12.12.2025 nga ora 09:30 sipas Aktakuzës së Prokurorisë Themelore në Prishtinë është anuluar, për shkak të pamundësisë për pjesëmarrje të anëtarit të trupit gjykues, gjyqtarit Alban Ajvazi. Seanca e radhës në këtë çështje penale është caktuar të mbahet me datë 22.12.2025, nga ora: 09:30”, tha Gashi për lajmi.net

Gjatë kësaj seance pritet të prezantohen pamjet e kamerave të sigurisë, të cilat përbëjnë prova të rëndësishme në procesin gjyqësor.

Liridona Ademaj është vrarë më 29 nëntor 2023, rreth orës 20:25, në rrugën “Dalip Alshiqi” në fshatin Bërnicë të Prishtinës./Lajmi.net/