Qeveria e Kosovës mbrëmë ka miratuar vendimin për zotimin e qeverisë për të subvencionuar energjinë elektrike. Sipas këtij vendimi, Qeveria  e Kosovës është zotuar që të ndajë 90 milionë euro për këtë mbështetje.

Kështu nga qeveria po thonë se për qëllim kanë uljen e ndikimit të tarifave për konsumatorët.

E ky vendim sipas ekzekutivit është marrë pas rritjes së çmimeve të importit dhe krizës së furnizimit me rrymë në Kosovë.

“Qeveria e Republikës së Kosovës ka zhvilluar mbledhjen elektronike, të 60-ën me radhë, në të cilën ka miratuar vendimin për zotimin e Qeverisë për subvencionimin e energjisë. Në mbledhjen e sotme është miratuar propozimi i Ministrisë së Ekonomisë për zotimin e Qeverisë për subvencionimin e pagesës së energjisë nga konsumatorët. Sipas vendimit të miratuar, Qeveria e Republikës së Kosovës është zotuar për subvencionim të energjisë në shumën prej 90.000.000.00 € (nëntëdhjetë milionë euro). Vendimi synon të ulë ndikimin e tarifave të energjisë për konsumatorët. Ky vendim është marrë pas rritjes enorme të çmimeve të importit, që ka shkaktuar krizën e furnizimit me energji elektrike në vend.”, thuhet në njoftimin e Zyrës së Kryeministrit.

Kosova është duke u përballur me krizë energjetike.

Zyra e Rregullatorit të Energjisë pritet që gjatë javëve në vijim të shqyrtojë raportin për rritjen e çmimeve të energjisë elektrike.

Komente për çmimet e tarifave në ZRRE kanë dërguar Ministria e Ekonomisë, Ministria e Financave, Lëvizja Vetëvendosje, Lidhja Demokratike e Kosovës, Aleanca për Ardhmërinë e Kosovës, KEDS, KOSTT dhe operatorë të tjerë.