Situata e sigurisë në Kosovë për shkak të zhvillimeve në veri të vendit, po konsiderohet ende e brishtë.

Kjo duket se ka bërë që misioni i NATO-s në Kosovë, KFOR, të shtojë prezencën e saj në gjithë vendin.

Vetëm gjatë kësaj jave, në Kosovë arritën dy kontingjente të trupave të KFOR-it gjerman dhe ata të Kroacisë.

Prezenca e shtuar e KFOR-it në vend po mirëpritet edhe nga ish-ushtarakët që vlerësojnë se kjo po bëhet për ruajtjen e sovranitetit të vendit.

Hysen Gecaj, kolonel në pension i Forcës së Sigurisë së Kosovës thotë se të gjitha këto veprime nga ana misionit paqeruajtës janë si masë parandaluese.

“Duhet ta potencojmë se këto janë masa parandaluese që mos të vijë deri te ndonjë incident i përmasave të mëdha e që pastaj mund të rritet në ndonjë konflikt lufte apo një luftë ndërmjet Serbisë dhe shteteve tjera në Ballkan. Kur them shteteve tjera e kam parasysh edhe Kosovën edhe Bosnje e Hercegovinën por edhe Kroacinë, Shqipërinë, Maqedoninë e kështu me radhë. Dhe kjo pastaj shkon zingjirë por për të mos ndodhë e gjitha kjo kemi vërejt që kohëve të fundit ka shtesë të numrit të pjesëtarëve të KFOR-it”, ka deklaruar ai.

Sipas tij, tentativa mund të ketë sërish për një sulm të mundshëm në pjesën veriore, por që do të jenë të pasuksesshme.

“Herë pas here dëgjojmë edhe deklarata të politikanëve të cilët potencojnë rrezikun dhe kërcënimet që paraqiten ne regjion mirëpo deklaratat e tyre po shkojnë më tepër në kuadër të angazhimeve të tyre politike sesa të ngjarjeve në terren për shkak se ka një shpërputhje mes asaj që deklarohet nga politikanët dhe ajo që po zhvillohet në terren… Tentativa për me pasë ngjarje si ajo e Banjskës natyrisht që nuk janë ndërprerë asnjëherë dhe përgatitje të tilla janë bërë në vazhdimësi dhe janë duke u bërë dhe që ajo qëndron mirëpo pikërisht për këto masa që i përmenda më herët kanë për qëllim parandalimin edhe akteve të tilla“, tha ai.

Edhe ish-ushtaraku, Fetah Zejnullahu vlerëson se gjithë këto veprime janë duke u bërë pas kërcënimeve direkte nga ana e Serbisë në drejtim të Kosovës.

Derisa thotë se nuk mund të ketë ndonjë konflikt për shkak të prezencës së madhe të NATO-s në vend.

“Serbia ose institucionet e Serbisë e dijnë shumë mirë me kënd kanë të bëjnë, këtë rast NATO-n, dhe mendoj që rasti i Banjskës ishte një mësim i mësuar për ata që menduan që këtë rast grupet kriminale apo terroriste që të shfrytëzojnë objektet fetare si mburojë për t’i realizuar ato aspiratat e tyre terroriste”, tha ai.

Shtimin e trupave të KFOR-it e ka mirëpritur edhe ministri i Mbrojtjes, Ejup Maqedonci gjatë një takimin me komandantin e misionit të premten.