Shteti që s’e njeh Kosovën shtyn sanksionet e BE-së kundër Rusisë
Bashkimi Evropian ka vonuar procedurat për të nisur implementimin e sanksioneve të reja kundër Rusisë, për shkak të rolit të saj në konfliktin në Ukrainë, për çka janë takuar sot ambasadorët e BE-së.
Bota
Ratifikimi i sanksioneve do të miratohej sot sikur në mesin e shteteve anëtare të BE-së do të kishte qëndrim unik.
Por afati për vendosjen e sanksioneve është shtyrë për shkak se një pjesëtar i BE-së e ka kundërshtuar planin.
Një burim i BE-së ka thënë për Radio Evropën e Lirë se Sllovakia ishte ajo që ka kundërshtuar planin, por vet ky vend e ka mohuar një gjë të tillë.
Mëngjesin e së hënës, diplomatë të BE-së kanë thënë se propozimi për sanksione të reja kundër Rusisë përfshin ndalimin e kredive dhe financimin nga vendet e BE-së për firmat e mëdha ruse të energjisë, duke përfshirë firmat Rosneft, Transneft dhe Gazprom.
Për këto sanksione liderët e BE-së kanë vendosur më 5 shtator.