Kryeministri Albin Kurti ka folur mbi të drejtat e shqiptarëve në Luginën e Preshevës, një ditë pasi Qeveria e Kosovës ka ndarë 1 milion e 852 mijë e 350 euro për Këshillin Kombëtar Shqiptar (KKSH).

Ai pas seancës së sotme të Kuvendit të Kosovës ka thënë se shqiptarët e Luginës së Preshevës po diskriminohen nga Serbia.

“Prej 300 të punësuarve në spitalin e Vranjës, vetëm dy shqiptarë janë atje. Ka shumë atje për të rregulluar të gjitha parregullsitë dhe që shqiptarët t’i kenë të drejtat që iu takojnë atyre”, tha Kurti.

Ndihma për Luginën e Preshevës ka për qëllim mbështetjen e projekteve dhe programeve për përmirësimin e pozitës së shqiptarëve dhe mbrojtjen e gjuhës, kulturës e identitetit shqiptar në Preshevë, Bujanoc dhe Medvegjë.

Vendimi mbështetet në memorandumin e bashkëpunimit mes Qeverisë së Kosovës dhe Këshillin Kombëtar Shqiptar.