Ariana Herri, një 23-vjeçare shqiptare, ka ndërruar jetë në një spital në Padova të Italisë.

Raportohet se Ariana fillimisht kishte shfaqur simptoma të lehta si kolla dhe ftohja pas një feste tradicionale në Maserada.

Gjendja e saj shëndetësore u përkeqësua shpejt, duke kaluar në të vjella të vazhdueshme dhe vështirësi në të ngrënë, çka detyroi familjen ta dërgonte menjëherë në spital.

E reja fillimisht u trajtua në spitalin Ca’ Foncello në Treviso, por për shkak të rëndimit të situatës, ajo u transferua në Padova, ku iu nënshtrua kujdesit intensiv.

“Përpjekjet e mjekëve për ta shpëtuar ishin të pamjaftueshme dhe Ariana humbi jetën për shkak të një miokarditi fulminant”.

Mediat italiane raportojnë se një autopsi e kryer sot pritet të ndihmojë në zbardhjen e shkaqeve të kësaj tragjedie. Ndërkohë, familja janë të shokuar nga humbja e papritur e 23-vjeçares.

Ajo punonte si banakiere në Maserada dhe ëndërronte të bëhej estetiste. Megjithatë, muajt e fundit ajo kishte përjetuar një periudhë të vështirë, duke vuajtur nga sulme paniku dhe takikardi, që besohet të kenë qenë pasojë e një lidhjeje të përfunduar.

Ceremonia mortore do të mbahet të hënën, më 27 janar, në orën 15:00, në varrezat komunale të Maseradës.