Dosjet e personelit në letër të disa drejtuesve të Europol-it u zhdukën nga selia e shërbimit policor evropian në Hagë diku para shtatorit të vitit të kaluar, raportoi POLITICO bazuar në një memo të brendshme dhe biseda me burime të përfshira.

Europol aktualisht po përpiqet të kuptojë se si dolën këto dosje letre, të cilat supozohej të mbaheshin në një kasafortë në një dhomë të sigurt ruajtjeje brenda zyrës.

“Më 6 shtator 2023, Drejtoria e Europolit u informua se dosjet personale në letër të disa anëtarëve të stafit të Europolit ishin zhdukur,” POLITICO citoi memorandumin e brendshëm, të datës 18 shtator.

“Duke pasur parasysh rolin e Europolit si autoritet i zbatimit të ligjit, zhdukja e dosjeve personale e anëtarëve të stafit përbën një incident serioz të sigurisë dhe shkeljes së të dhënave personale.”

Faqja e lajmeve foli me katër zyrtarë aktualë dhe ish-zyrtarë të Europolit, të cilët dinë për incidentin. Ata thanë se dosjet e vjedhura përfshijnë ato të Drejtoreshës Ekzekutive të Europolit Catherine De Bolle dhe tre zëvendësdrejtorëve – Jürgen Ebner, Andrei Lințǎ dhe Jean-Philippe Lecouffe. Dosjet e personelit mund të përmbajnë të gjitha llojet e të dhënave të ndjeshme, duke përfshirë datat e lindjes, statusin martesor, vartësit, adresën aktuale dhe informacionin rreth aplikimit për punë të zyrtarit.

Disa nga dosjet u gjetën kur një qytetar i gjeti të braktisura në një vend publik në Hagë dhe i çoi në një stacion policor lokal, thanë ata. Është e paqartë nëse kjo ishte mënyra se si u zbulua shkelja.Europol i mban dosjet e tij të ndjeshme HR në kopje të shtypur të mbyllur në një kasafortë në një dhomë me akses të kufizuar, thanë burimet e POLITICO.

Shumë pak njerëz e dinë kodin e kasafortës. Është ende e paqartë se si dhe pse janë marrë dosjet ose sa kohë kanë munguar përpara se të zbulohej shkelja e të dhënave. Pas incidentit, Europol vendosi kreun e tij të Burimeve Njerëzore, Massimiliano Bettin, në pushim administrativ, thanë zyrtarët faqes.

Agjencia njoftoi Mbikëqyrësin Evropian të Mbrojtjes së të Dhënave (EDPS) dhe anëtarët e stafit të prekur për shkeljen. Europol është përgjegjës për koordinimin e hetimeve ndërkombëtare që përfshijnë shërbime të shumta policore evropiane.

Ai është gjithashtu përgjegjës për bashkëpunimin me autoritete të tjera ndërkombëtare si Interpoli apo FBI-ja amerikane. Është një nga agjencitë më të mëdha të Bashkimit Evropian, që punëson rreth 1400 njerëz.