Azem Vllasi thotë se Qeveria e re e Serbisë, e cila do të dalë pas zgjedhjeve të 16 marsit, nuk do të nxitojë që të vazhdojë Dialogun me Kosovën.

Bisedimet politike përmes të cilave u arrit Marrëveshja e Brukselit për normalizimin e marrëdhënieve mes dy shteteve, sipas tij, Serbisë i janë dashur vetëm për ta trasuar rrugën e saj europiane.

Në një prononcim për lajmi.net, Vllasi pohon se shteti fqinjë do të mundohet sa më shumë të “zhagisë” procesin e bisedimeve, pasi ajo tashmë ka filluar negociatat për anëtarësim në BE.

“Pas formimit të Qeverisë së re në Serbi, ata nuk do të nxitojnë për vazhdimin e dialogut. Dialogu i është dashur deri tani për ta trasuar agjendën europiane.”

“Pasi që Serbia ka marrë statusin e kandidatit dhe ka filluar negociatat për anëtarësim, nuk ka nevojë të nxitojë për aq sa e detyron Brukseli që të vazhdojë bisedat.”

“Por, Serbia do të vazhdojë me kushtet të reja, do të shantazhojë deri diku palën kosovare dhe do të tenton të tregohet që e ka pozicionin më të fort në bisedime”.

Takimi i fundit në mes të dy Kryeministrave Hashim Thaçi dhe Ivica Dacic, u zhvillua në muajin shkurt, ku ishin pajtuar në parim, për çështjet që ka të bëjnë me gjyqësinë.

Edhe vetë ndërmjetësuesja e këtij dialogu, Baronesha Catherine Ashton, ka deklaruar se nuk dihet se kur do të mbahet raundi i ri, duke marrë parasysh që të dy vendet pritet të përfshihen në procese zgjedhore.

Serbia pritet të mbajë zgjedhjet e jashtëzakonshme parlamentare të dielën, ndërsa Kosova duket se do të vendosë t’i zhvillojë ato në qershor.

Vllasi flet edhe për zgjedhjet e nesërme që mbahen në Serbi. Si fitues e sheh Kryetarin e Partisë Progresiste Serbe, Aleksandar Vucic.

“Sondazhet si duket janë reale dhe partia e Vucicit do të arrijë të sigurojë vota më së shumti në Serbi, por nuk do ta fitojë shumicën absolute. Megjithatë, duhet të bëjë me dikë koalicion”.