Pa një kompromis të tillë ndërmjet partive të shumicës dhe atyre të minoriteteve, do të ishte pak e imagjinueshme që të arrihet suksesi në votimin e ndryshimeve kushtetuese për themelimin e Forcave të Armatosura të Kosovës, shkruan “Tribuna”.

Themelimi i FAK si dhe vazhdimi i ulëseve të rezervuara kërkojnë ndryshime adekuate kushtetuese.

Përpos LDK-së e Vetëvendosjes, pjesa tjetër e spektrit politik po shprehet e gatshme që t’u vazhdojë pakicave mandatin e vendeve të rezervuara në shkëmbim të votave të tyre për themelimin e FAK-ut.

Mbështetje themelimit të FAK-ut, të martën i ka dhënë edhe ambasadorja amerikane, Tracy Ann Jacobson, e cila pritet të jetë edhe nikoqire e takimit të sotëm.

Ndërsa ministri për Punë dhe Mirëqenie Sociale në Qeverinë e kosvoës, Nenad Rashiq, ka thënë se pa vazhdimin e ulëseve të rezervuara edhe për dy mandate, do të ishte e paimagjinueshme që minoritetet të votojnë për krijimin e Forcave të Armatosura.

“Nëse nuk vjen deri te bisedimet për vendet e rezervuara dhe nëse nuk gjendet një kompromis, mendoj se në asnjë mënyrë nuk do të mund të vërtetoja dhe të them se do të votojmë formimin e Forcave të Armatosura”, është shprehur Rashiq, shkruan “Tribuna”.