Në kuadër të përgatitjes së seancës konstituive që do të mbahet me 15 prill, kryetari i Kuvendit të Kosovës, Glauk Konjufca do të takohet javën e ardhshme me kryetarët e partive politike.

Konjufca në cilësinë e kryeparlamentarit do të takohet me 8 prill me liderët e partive politike që kanë siguruar ulëse në Kuvend për të diskutuar për përgatitjet e seancës konstituive të legjislaturës së nëntë.

Një gjë të tillë e ka konfirmuar Ilir Kërçeli, shefi i kabinetit të kryeparlamentarit Glauk Konjfca, i cili tashmë është edhe deputet i zgjedhur në legjislaturën e re.

Seanca konstituive e Kuvendit të Kosovës pas zgjedhjeve të 9 shkurtit do të mbahet më 15 prill.

Në bazë të rezultateve të zgjedhjeve të 9 shkurtit, Lëvizja Vetëvendosje ka dalë e para me 42.30 për qind të votave, Partia Demokratike e Kosovës 20.95 për qind, Lidhja Demokratike e Kosovës 18.27 për qind, koalicioni AAK-Nisma 7.06 për qind. Në bazë të këtyre shifrave, Lëvizja Vetëvendosje do t’i ketë 48 deputetë, PDK 24, LDK 20, AAK-Nisma 8 si dhe komunitetet jo shumicë 20 deputetë.

Lideri i LVV-së, Albin Kurti, veçse ka nisur konsultimet me partitë joshumicë për formimin e qeverisë së re.