Sami Lushtaku kandidat i PDK-së për Skenderaj

Lajme

10/07/2025 17:44

Ish-kryetari i Komunës së Skenderajt dhe figura e njohur e Partisë Demokratike të Kosovës (PDK), Sami Lushtaku, ka shpallur zyrtarisht kandidaturën e tij për zgjedhjet lokale që do të mbahen më 12 tetor të këtij viti. Ai mori mbështetjen unanime të Kryesisë së Degës së PDK-së në Skenderaj për të garuar për postin e kryetarit të komunës.

Lushtaku tha se vendimi për të kandiduar erdhi si përgjigje ndaj mbështetjes së vazhdueshme që ka marrë nga qytetarët ndër vite, si dhe si një akt kundër padrejtësive që, sipas tij, i janë bërë në të kaluarën, përfshirë mbajtjen në burg për 4 vite e gjysmë gjatë viteve 2013-2017, nga ku në fund është shpallur i pafajshëm. Ai përmendi edhe ndalimin e kandidimit të tij në zgjedhjet e vitit 2021 nga ana e KQZ-së, për të cilin fajëson presionet politike të pushtetit të tanishëm, transmeton lajmi.net.

Në deklaratën e tij publike, Lushtaku theksoi se kandidimi i tij është një thirrje për bashkim, drejtësi dhe zhvillim të Skenderajt. Ai premtoi se çdo vit do të sjellë më shumë projekte, punësim dhe udhëheqje të drejtë për të gjithë qytetarët. Programin e tij të plotë ka paralajmëruar se do ta prezantojë gjatë javëve në vijim.

Lushtaku shprehu falënderime të veçanta për kryetarin aktual të Komunës së Skenderajt, Fadil Nura, për bashkëpunimin dhe angazhimin gjatë kësaj periudhe, duke shtuar se ai dhe PDK do të vazhdojnë të jenë pranë qytetarëve në çdo hap dhe proces.

Postimi i plotë:

Të dashur qytetarë të Skenderajt,

Sot, Kryesia e Degës së PDK-së në Skenderaj, në mënyrë unanime, mbështeti kandidaturën time për kryetar të komunës së Skenderajt për zgjedhjet lokale të 12 tetorit.

Ky vendim i imi erdhi si përgjigje ndaj besimit tuaj të vazhdueshëm ndaj meje në çdo palë zgjedhje, prej që jam futur në politikë.

Kandidatura ime vjen edhe si rezultat i padrejtësive ndaj meje në të kaluarën, përfshirë mbajtjen e 4 vite e gjysmë burgim gjatë viteve 2013-2017, proces nga i cili në fund jam shpallur i pafajshëm, si dhe më pas, moslejimi i kandidaturës sime në zgjedhjet lokale të vitit 2021 nga KQZ, për shkak të presioneve politike nga eksponentë të pushtetit aktual i cili tashmë është në shkuarje.

Të dashur qytetarë,

Unë jam prej atyre njerëzve që nuk ndalen.

Unë i kam borxh të përjetshëm Skenderajt, qytetarëve të tij dhe çdo njeriu që e ka në zemër Drenicën.

Kandidimi im është thirrje për bashkim, për zhvillim, për drejtësi dhe për dinjitetin e Skenderajt.

Skenderaj do të bëhet çdo vit më i zhvilluar, me punë, me projekte dhe me udhëheqje të drejtë për të gjithë kurse programin e plotë do ta paraqes gjatë javëve të ardhshme.

Një falënderim i veçantë shkon për kryetarin aktual të komunës, Fadil Nura, për punën dhe bashkëpunimin e shkëlqyer gjatë kësaj periudhe.

Duke qenë mirënjohës përjetë për besimin dhe mbështetjen tuaj ndaj meje dhe ndaj Partisë Demokratike të Kosovës, do të jemi bashkë si gjithmonë në çdo proces!

Faleminderit përjetësisht!

/lajmi.net/