Ish-deputetja e PDK-së, Sala Jashari, ka publikuar një mesazh me rastin e 28 Nëntorit, ku përveç urimit, ka paralajmëruar se nëse fiton një mandat të ri në Kuvendin e Kosovës, do të ndërmarrë nismën për ta shpallur këtë datë festë shtetërore.

Jashari theksoi se 28 Nëntori është një ditë me rëndësi të jashtëzakonshme për shqiptarët, jo vetëm për faktin se është festë kombëtare, por edhe për simbolikën e saj në historinë e Kosovës. Ajo kujtoi se kjo datë lidhet me lindjen e heroit kombëtar Adem Jashari si dhe me dalje e parë publike të Ushtrisë Çlirimtare të Kosovës në vitin 1997, transmeton lajmi.net.

“Kjo datë nuk është vetëm një shenjë kalendarike. Ajo është kujtesë e përbashkët, rrënjë dhe trashëgimi që na bashkon si komb,” shkroi Jashari, duke shtuar se 28 Nëntori ende nuk e ka vendin e merituar si ditë zyrtare në Republikën e Kosovës.

Ajo shprehu qartë zotimin e saj politik: “Nëse edhe në legjislaturën tjetër do të arrij të jem pjesë e Parlamentit të Kosovës, në pozitën e deputetes, do të ndërmarr nismën që 28 Nëntori të shpallet festë shtetërore në Republikën e Kosovës.”

Sipas saj, ky propozim nuk synon vetëm aspektin ceremonial, por përfaqëson nderim për dëshmorët, veteranët dhe të gjithë ata që kanë kontribuar për lirinë e Kosovës. Jashari tha se bashkimi i këtyre datave në një të vetme është i domosdoshëm për të ruajtur kujtesën historike dhe identitetin kombëtar.

Në fund të mesazhit, ajo uroi qytetarët: “Gëzuar 28 Nëntorin, ditën e dinjitetit dhe krenarisë sonë të përbashkët.”

Postimi i plotë: