Stërvitjet fillojnë të njëjtën ditë kur NATO-ja dhe disa nga partnerë të saj fillojnë një stërvitje trajnimi në Arktik.

Veprimet e Rusisë në Ukrainë dhe inkursionet në hapësirën ajrore perëndimore kanë çuar në rritjen e tensioneve me Perëndimin.

Sipas raporteve të agjencive ruse Interfax dhe TASS, inspektimi i grupit të aviacionit dhe të forcave të mbrojtjes ajrore në qarkun ushtarak qendror, përfshinë pothuajse 700 lloje të ndryshme të armëve dhe pajisjeve ushtarake.

Caroline Wyatt, korrespondent i BBC-së në Moskë, ka thënë se stërvitjet e nisura sot janë si përgatitje për një ushtrim tjetër edhe më të madh, të njohur si “Qendra 2015”, që pritet të mbahen në muajt e ardhshëm.

I pyetur të komentojë në lidhje me këmbëngulësinë e Rusisë që po tregon ndaj zhvillimeve në Ukrainë dhe në raport me Perëndimin, zëvendëskryeministri rus, Dimitri Rogozin, të cilit nuk i lejohet udhëtimi në vendet perëndimore, tha me shaka se “tanket ruse nuk kanë nevojë për viza”.

Bashkimi Evropian dhe Shtetet e Bashkuara të Amerikës kanë vendosur sanksione ndaj Rusisë, pas aneksimit të Krimesë nga Ukraina vitin e kaluar, si dhe nxitjen e konfliktit në dy rajone tjera ukrainase, Luhansk dhe Donetsk, ku deri në arritjen e një armëpushimi tre muaj më parë, gjatë luftimeve mes trupave qeveritare dhe separatistëve prorusë, u vranë mbi gjashtë mijë veta.

Rusia është kritikuar shumë në muajt e fundit edhe mbi rritjen e aktivitetit të saj ushtarak në hapësirën ajrore rreth vendeve nordike, duke përfshirë disa shkeljeve të hapësirës ajrore me avionë ushtarakë.

Ushtrimi i NATO-s, që po ashtu filloi sot dhe do të vazhdojë për dy javë, do të fokusohet në veri të Norvegjisë, Suedisë dhe Finlandës. Testi i gatishmerisë për tu mbrojtur do të përfshijë 115 avionë luftarakë dhe 3600 trupa nga nëntë vende.

Në stërvitjet në arktik do të përfshihen trupa dhe aeroplanë nga SHBA-të, Britania, Gjermania, Franca dhe Holanda, të gjithë anëtarët e NATO-s, si dhe Zvicra neutrale. Ushtrimi është i dyti i këtij lloji, pas testeve të ngjashme në 2013.

Ministrat e mbrojtjes të Norvegjisë, Suedisë, Finlandës dhe Danimarkës, së bashku me ministrin e jashtëm të Islandës, nënshkruan një deklaratë të përbashkët në muajin prill kundër shkeljeve të hapësirës ajrore nga ana e Moskës, dhe e quajtën Rusinë si “sfida më e madhe për sigurinë evropiane”. /lajmi.net/