Komanda ushtarake ruse po vendos njësi të Koresë së Veriut, për të ndihmuar në operacionet ushtarake në rajonin Sumy të Ukrainës, tha Shtabi i Përgjithshëm i Ukrainës.

Shtabi i Përgjithshëm raportoi se këto njësi, që veprojnë nga rajoni Kursk i Rusisë, po kryejnë zbulim me mjete ajrore pa pilot, duke identifikuar pozicionet ukrainase dhe duke ndihmuar në rregullimin e zjarrit kundër tyre në rajonin Sumy.

Forcat mbrojtëse të Ukrainës kanë kapur komunikimet midis operatorëve të dronëve të Koresë së Veriut dhe personelit rus. Operatorët u vunë re duke rregulluar zjarrin e artilerisë raketore mbi pozicionet ukrainase.

Shtabi i Përgjithshëm i Ukrainës thotë se udhëheqja e Rusisë vazhdon të përfshijë njësi të Koresë së Veriut në operacione aktive luftarake për shkak të humbjeve kritike të personelit, dhe dështimit të ofensivës së saj në Sumy.

Forcat e Armatosura të Ukrainës po dokumentojnë të gjitha rastet e regjistruara të pjesëmarrjes së formacioneve të huaja në agresionin e armatosur. Njësitë e përfshira në agresion kundër Ukrainës do të neutralizohen në përputhje me ligjet dhe rregullat e luftës.