Gjatë muajit gusht 2025, në Kosovë janë regjistruar  1 601, fluturime, që përfaqëson një rritje prej 10.1% krahasuar me të njëjtën periudhë të vitit të kaluar, sipas një raporti të publikuar nga Agjencia e Statistikave të Kosovës (ASK).

Po ashtu, numri i udhëtarëve ajrorë ka arritur në 512,955, duke shënuar një rritje prej 14.6% krahasuar me gushtin e vitit 2024. Megjithatë, çmimet e biletave të fluturimeve kanë shënuar një rritje të ndjeshme prej 22.5% gjatë muajit shtator, njofton ASK, transmeton lajmi.net.

Sa i përket transportit hekurudhor, gjatë gushtit janë regjistruar 7,732 udhëtarë, që është një rritje prej 54.8% në krahasim me gushtin e vitit të kaluar. Megjithatë, në këtë sektor nuk është regjistruar asnjë sasi e transportit të mallrave, pasi sasia në neto ton ka qenë zero.

Në sektorin e telekomunikacionit, telefonia mobile ka shënuar rritje të lehtë në numrin e përdoruesve. ASK raporton se në gusht 2025, numri i përdoruesve me parapagim (Prepaid) ishte 1,741,080, që përfaqëson një rritje prej 0.19%, ndërsa numri i përdoruesve me kontratë (Postpaid) ka arritur në 320,058, duke shënuar një rritje më të theksuar prej 3.42% krahasuar me të njëjtën periudhë të vitit të kaluar./lajmi.net/