Janë shtuar tensionet te skuadra e Red Bull mes dy pilotëve të skuadrës, Max Verstappen e Sergio Perez.

Sergio Perez dhe Max Verstappen duket se kanë prishur raportet mes vete dhe kjo u dëshmua edhe në garën e sotme në Brazil.

Skuadra i kërkoi Verstappen t’i linte pozitën e tij pilotit meksikan për t’i ndihmuar për pozitën e dytë, por holandezi refuzoi të bënte një gjë të tillë.

Pas garës, Perez u shpreh i mllefosur duke thënë se veprimi i sotëm ka treguar se kush është Verstappen me të vërtetë.

“Faleminderit, faleminderit për këtë djema. Kjo tregon se kush është ai në të vërtetë”, ka thënë Perez në radio, përcjell lajmi.net.

Kurse, pas garës shtoi edhe disa komente të tjera.

“Nuk e kuptoj pse Max nuk më dha pozitën pas gjithë atyre gjërave që kam bërë për të. Nëse ka dy tituj të kampionit është për shkakun tim”, ka shtuar Checo.

Mbetet të shihet nëse Perez do të mund ta sigurojë pozitën e dytë në sezonin 2022, në garën e fundit që zhvillohet në Abu Dhabi. /Lajmi.net/