Paneli Zgjedhor për Ankesa dhe Parashtresa në vazhdimësi po e përcjell fushatën elektorale të partive politike për zgjedhjet e 9 shkurtit, e në çdo shkelje të ligjit nga ana e tyre PZAP po iu shqipton dënime.

Së fundmi, ndër gjobat më të larta PZAP i ka shqiptuar Lëvizjes Vetëvendosje si shkak i një deklarate nga kryeministri aktual dhe kandidati për kryeministër nga kjo parti, Albin Kurti.

35 mijë euro, është gjoba e shqiptuar për VV-në pasi Kurti tha se “jemi duke i hequr qafe” derisa fliste për opozitën, shkruan lajmi.net.

“…jemi duke i hequr qafe, duke i pensionuar, duke i eliminuar nga skena e pushtetit politikanët, himni i të cilëve nuk është rreth flamurit të përbashkuar, por rreth korrupsionit të përbashkuar, të dashur qytetarë të Drenasit ata i ka bashkuar korrupsioni. Ata po i ndanë e po i përçan paraja e plaçkitur dhe zhvatur nga korrupsioni i tyre i përbashkët. Pra, edhe njëherë korrupsionin e kishin të përbashkët, por paraja po i ndanë e po i përçan prandaj ata që ishin të pabesë janë bërë edhe të pashpresë”, kishte thënë Kurti në Drenas.

Kjo ankesë në PZAP ka shkuar nga Partia Demokratike e Kosovës.

Deri më 2 shkurt, vlera totale e gjobave të vendosura nga PZAP ka arritur në 515,000 euro./Lajmi.net/