Rasti i plagosjes së Milan Vukashinoviq-it nga Leposaviqi, i cili u plagos rëndë në fillim të nëntorit 2025 pranë fshatit Jelakcë në rrethana ende të paqarta, vazhdon të ngjallë interes në publik. Sipas deklaratave të publikuara nga media serbe Nova.rs, të plagosurit i janë afruar autoritetet dhe ka dhënë dëshmi të detajuara para prokurorit për ngjarjen.

Më 12 dhjetor 2025, Vukashinoviq ka dhënë një deklaratë para prokurorit të lartë publik në Prokuplje, në spitalin e burgut në Beograd, ku ka përshkruar se më 1 nëntor ai u plagos me disa të shtëna në shpinë pranë fshatit Jelakcë. Sipas tij, gjatë ngjarjes, automjeti që po drejtonte goditi një pengesë në rrugë dhe më pas u rrethua nga disa persona që filluan të qëllonin. Ai pretendon se pas përplasjes, persona të panjohur e çuan në automjetin e Dragomir A., dhe më pas ai u dërgua fillimisht në spitalin në Prokuplje, më pas në Qendrën Klinike të Nishit, dhe më pas në Burgun Qendror të Beogradit.

Vukashinoviq pësoi lëndime të rënda, duke përfshirë plagë me armë zjarri në shpinë (plumbi është ende në trup), frakturë të kyçit të këmbës së djathtë dhe heqje të një veshke. Ai mohoi të ketë kryer veprën penale për të cilën akuzohet, transmeton lajmi.net.

Sipas Nova.rs, ai gjithashtu ka folur për jetën e tij në Kosovë dhe Metohi, duke deklaruar se kishte përjetuar vështirësi për punësim dhe kishte bashkëpunuar me përfaqësues të Listës Serbe dhe institucione të Kosovës për të siguruar punë në pikën kufitare të Jarinjës.

Definitivno je Srbin MILAN VUKAŠINOVIĆ streljan srpskim metkom, kao životinja!

Danas je pronađen MILANOV automobil koji je uništen prilikom napada na njega!

Pozivam Eulex i Kfor da izvrše uviđaj lica mesta, ali MEĐUNARODNU ZAJEDNICU da reaguje, jer ovo je “Banjska 2” 👇 pic.twitter.com/ztAVY40xUS

— Ivan Ninić (@INinic) November 8, 2025

Informacioni për plagosjen e tij u bë publik për herë të parë nga avokati i familjes, Ivan Niniq, përmes rrjetit social X, i cili ngriti pyetje rreth rrethanave të të shtënave. Sipas pretendimeve, Vukashinoviq u plagos nga persona të veshur me uniforma ushtarake, pa targa dhe pa shenja dalluese.

Vukashinoviq është ende në spitalin e burgut në Beograd dhe masa e paraburgimit ndaj tij është ende në fuqi. Avokati i tij ka paraqitur një ankesë në Departamentin e Kontrollit të Brendshëm të Ministrisë së Punëve të Brendshme të Serbisë, duke dyshuar se të shtënat janë kryer nga anëtarë të MUP-it serb.

Nga ana tjetër, Policia e Kosovës ka njoftuar se më 1 nëntor 2025 mori informacion për rrëmbimin dhe plagosjen e tij nga Xhandarmëria Serbe në zonën e Leposaviqit.

Lidhur me këtë rast, avokati Ivan Niniq dhe gazetari Nemanja Sharoviq kanë marrë kërcënime për raportimin dhe publikimin e informacioneve lidhur me ngjarjen, siç raportohet nga grupet në Telegram.

Ky rast mbetet ende nën hetim dhe informacioni zyrtar për autorët dhe motivet e ngjarjes nuk është bërë publik. /Lajmi.net/