Ish-ambasadori holandez në Kosovë, Robert Bosch, ka reaguar lidhur me ngërçin politik në vend rreth zgjedhjes së presidentit, duke bërë thirrje për kompromis mes partive politike.

Bosch ka theksuar se do të ishte problematike për Kosovën nëse nuk arrihet zgjedhja e presidentit, duke paralajmëruar se zgjedhjet e reja nuk do ta ndryshonin situatën aktuale.

“Do të ishte keq për Kosovën që të mos jetë në gjendje të zgjedhë një president dhe zgjedhjet e reja nuk do ta përmirësojnë situatën, pasi ajo do të jetë e ngjashme me tani nëse partitë sërish nuk janë të gatshme të lëvizin. Për të mirën e vendit: kompromis!”, ka deklaruar Bosch.

Deklarata e tij vjen në kohën kur skena politike në Kosovë po përballet me paqartësi rreth procesit të zgjedhjes së presidentit dhe mundësisë për zgjedhje të reja në rast të mosarritjes së marrëveshjes deri më 28 prill.

Kryeministri Albin Kurti ka paralajmëruar se në rast se nuk arrihet zgjedhja e presidentit, vendi mund të shkojë në një seri zgjedhjesh të njëpasnjëshme, duke fajësuar opozitën për mungesë vullneti politik.

Ndërkohë, ushtruesja e detyrës së presidentes, Albulena Haxhiu, ka shprehur gatishmëri për lëvizje politike në drejtim të zhbllokimit të situatës, por ka vënë në dyshim gatishmërinë e partive opozitare për kompromis.

Edhe nënkryetari i Lidhja Demokratike e Kosovës, Lutfi Haziri, ka deklaruar se situata aktuale i ngjan ngërçit të vitit të kaluar, duke kritikuar qasjen e kryeministrit në menaxhimin e proceseve politike.

Situata politike mbetet e paqartë, ndërsa afati kushtetues për zgjedhjen e presidentit po afrohet. /Lajmi.net/