Reuters, ka raportuar lidhet me komunikatën e BIA’s, ku presidenti serb Aleksandar Vuçiq, këshillohet që të mos udhëtojë për në Mal të Zi. Reuters, raporton se, agjencia e sigurisë e Serbisë e paralajmëroi Vuçiq që të mos udhëtojë të premten në Mal të Zi për një samit me liderët e Bashkimit Evropian dhe të Ballkanit, duke përmendur kërcënime të sigurisë mes tensioneve diplomatike në rritje ndërmjet dy vendeve.

Presidenti francez Emmanuel Macron, kancelari gjerman Friedrich Merz dhe presidentja e Komisionit Evropian Ursula von der Leyen pritet të mbërrijnë të premten në qytetin bregdetar të Tivatit për t’u takuar me liderët e gjashtë vendeve të Ballkanit Perëndimor dhe për të diskutuar përparimin drejt anëtarësimit në BE.

Në raportimin e Reuters, theksohet se, BIA tha në një deklaratë të mërkurën vonë se udhëtimi në Mal të Zi paraqet rrezik të lartë sigurie për Vuçiqin për shkak të “aktiviteteve armiqësore të shërbimeve të huaja sekrete dhe pranisë së një klani kriminal atje”.

Kryetarja e Parlamentit të Serbisë, Ana Brnabiq, tha se Vuçiq planifikon të udhëtojë në Tivat pavarësisht paralajmërimit dhe se do të zhvillojë disa takime të rëndësishme atje.

Paralajmërimi erdhi pasi mediat në Podgoricë raportuan se Mali i Zi të mërkurën kishte kthyer mbrapsht një aeroplan me 87 persona nga Serbia që kishte zbritur në Tivat, duke vlerësuar se ata përbënin kërcënim për sigurinë para Samitit BE–Ballkani Perëndimor.

Portali i lajmeve “Vijesti” raportoi se policia kishte sekuestruar edhe dy autobusë që duhej ta transportonin këtë grup.

Marrëdhëniet ndërmjet Serbisë dhe Malit të Zi janë të tensionuara për shkak të lidhjeve të Podgoricës me Kosovën, të cilën Serbia nuk e njeh, si dhe për shkak të ndikimit të Beogradit në çështjet e brendshme politike përmes kishës dhe partive politike të afërta me Partinë Përparimtare Serbe të Vuçiqit.

Anëtar i NATO-s, Mali i Zi fitoi pavarësinë në vitin 2006 pas shpërbërjes së bashkimit me Serbinë dhe, ndryshe nga Beogradi, vendosi sanksione ndaj Rusisë, duke harmonizuar politikën e tij të jashtme me atë të Bashkimit Evropian.

Të mërkurën në mbrëmje, Serbia vendosi kontrolle më të rrepta në kufirin me Malin e Zi, gjë që shkaktoi kolona të gjata në pikat kufitare, raportoi televizioni serb N1.