Gjykata Themelore në Prishtinë ka shpallur aktgjykim lirues për Sami Lushtakun dhe shtatë të akuzuarit e tjerë në rastin ku ngarkoheshin për pjesëmarrje në grup të organizuar kriminal, pengim të dëshmisë apo procedurës zyrtare dhe frikësim gjatë procedurës penale.

Përveç Lushtakut, aktgjykimi lirues u shqiptua edhe për Ismet Haxhën, Rrustem Rrukollin, Fatmir Mjakun, Rexhep Xhotën, Skender Tahirin, Sheremet Jasharin dhe Bajram Dibranin, transmeton lajmi.net.

Vendimi u shpall të martën nga kryetari i trupit gjykues, Leon Përlaska, i cili tha se gjatë procesit gjyqësor nuk është arritur të provohet se të akuzuarit kanë kryer veprat penale për të cilat ngarkoheshin. Për këtë arsye, ata u liruan nga të gjitha pikat e aktakuzës.

Procesi gjyqësor ndaj këtyre tetë personave ishte zhvilluar vetëm për pikat 16, 17 dhe 18 të aktakuzës, pasi procedura për këto pika ishte veçuar nga pjesa tjetër e rastit.

Në pjesët e tjera të aktakuzës ishin përfshirë edhe Emrush Thaqi, Shemsi Hajrizi, Sahit Jashari, Mergim Lushtaku, Dardan Geci, Bashkim Dervisholli, Valon Behramaj, Argjent Behramaj, Yll Blakaj, Gzim Ahmeti, Xhevdet Zena, Mervete Hasani-Lushtaku, Agim Ukaj, Ismail Dibrani, Sami Gjoka dhe Nexhib Shatri./lajmi.net/