Një sulm i rëndë raportohet të ketë ndodhur sot në lagjen Ulpiana të Prishtinës.

Siç ka raportuar gazeta Sinjali, viktima e këtij sulmi ishte gjinekologu i njohur Afrim Veliu i moshës rreth 60 vjeçare.

Bazuar në këto raportime , thuhet se Veliu është sulmuar fizikisht në mes të rrugës nga një person ende i panjohur.

Ngjarja ka ndodhur në orët e mbrëmjes, rreth orës 21:30, në rrugën “Henry Dynant”, ku mjeku ishte duke kaluar, kur papritur është goditur me forcë nga një individ i panjohur.

“Ishte i tëri i përgjakur, nuk dinte nga të shkonte. Po kërkonte ndihmë, me duar në kokë“, ka rrëfyer për Sinjalin një banor i ndërtesave përreth që kishte parë ngjarjen.

Sipas dëshmitarit okular, sulmi ishte brutal dhe i paarsyeshëm, ndërsa autori ishte i veshur në të zeza, me trup i gjatë dhe është larguar pas sulmit me vrap.

Lajmi.net ka kontaktuar me Policinë e Kosovës dhe po pret një përgjigje për detaje rreth rasti.

Ne do t’iu mbajmë të informuar në lidhje me këtë rast.