Sot kryeministrit të Kosovës, Albin Kurtit do t’i dorëzohet Raporti i Progresit nga Shefi i Zyrës së Bashkimit Europian në Kosovë, Aivo Orav.

Në shumicën e fushave që mbulon ky Raport konstatohet se Kosova ka ende shumë punë për të bërë në procesin e reformave, sidomos në administratën publike, për të arritur progres.

Në këtë Raport përmendet edhe procesi i zgjedhjes së Kryeprokurorit të Shtetit, ku kërkohet që të përsëritet shpejtë.

“KPK duhet të përsërisë shpejt procesin për zgjedhjen e Kryeprokurorit të Shtetit, duke respektuar parimet e transparencës dhe meritokracisë”, thuhet në Raportin e Progresit të BE-së.

Të njëjtën gjë e ka kërkuar edhe Presidentja e Kosovës, Vjosa Osmani e cila më 17 tetor 2023, në një konferencë për medie, ka bërë të ditur se e ka njoftuar Këshillin Prokurorial të Kosovës se duke u bazuar në shkeljet që janë evidentuar në proces, nuk mund ta dekretojë Blerim Isufajn për Kryeprokuror të Shtetit.

Raporti i Progresit thekson se funksionimi i KGJK-së dhe KPK-së është adekuat, por përbërja e tyre e plotë duhet të sigurohet vazhdimisht.

Më tej aty përmendet se “Kosova ka një strategji për sundimin e ligjit për 2021-2026, por plani i veprimit për 2024-2026 është i vonuar. Zbatimi dhe monitorimi i dokumenteve strategjike ka nevojë për përmirësim”

Raporti përmend faktin se se pavarësisht këshillave të forta nga Bashkimi Evropian, Komisioni i Veneciar nuk u konsultua nga qeveria për paketën e reformës legjislative.

Edhe ambasadori amerikan në Kosovë, Jeffrey Hovenier, kishte thënë se KPK-ja duhet të ndërmarrë hapat e nevojshëm, në përputhje me standardet e qeverisjes së mirë, për të rikthyer besimin e publikut dhe partnerëve ndërkombëtar në KPK si institucion publik.