Kjo është thënë nga Aleksandra Joksimoviq, nga Qendra për Politikë të Jashtme serbe.

Vuçiqi do të jetë tri ditë në Turqi dhe Rusi, por Joksimoviq ka thënë për Tanjug se vizita e tij do të ndryshojë raportet e Serbisë dhe Turqisë, transmeton lajmi.net.

Ajo thotë se pikëpamjet e Turqisë dhe Rusisë janë të ndryshme në raport me Kosovën, pasi Turqia ishte një nga vendet e para që njohu pavarësinë e Kosovës dhe kjo arsye ka bërë që shpesh në ketë keqkuptime mes shteteve, por qëllimi i vizitave është të forcohen lidhjet.

Edhe profesori i marrëdhënieve ndërkombëtare, Srgjan Perishiq, vlerëson para vizitës së presidentit Aleksandar Vuçiq në Ankara dhe Moskë se marrëdhëniet e mira midis këtyre dy vendeve janë në favor të Serbisë dhe fokus i bisedimeve do të jetë bashkëpunimi ekonomik, por edhe çështja e Kosovës.

Perishiq, për Tanjug vuri në dukje se marrëdhëniet politike dhe ekonomike mes Serbisë dhe Turqisë që nga viti 2016, janë në rritje, kryesisht për shkak se Turqia në atë kohë kishte ndryshuar politikën e saj dhe ka bërë një distancim nga “politika neo-otomane”.

Sipas tij, deklarata e dikurshme e ish-ministrit turk të Punëve të Jashtme, Ahmet Davutoglu, se “Kosova është Turqi, e Turqia është Kosovë”, sikurse edhe “Bosnja është turke, e Turqia boshnjake”, tani janë me siguri gjëra të së kaluarës.

“Deri tek ky keqkuptim ka ardhur pasi që në maj dhe qershor të vitit 2016 ka pasur ripërtëritje të marrëdhënieve të Turqisë me Rusinë. Kjo ka ndikuar edhe në ndryshimin e politikës së saj karshi Ballkanit. Sikur të mos kishte raporte të mira mes Ankarasë dhe Moskës, s’do të kishte raporte të mira as mes Ankarasë e Beogradit”, ka vlerësuar Perishiq.

Marrëdhëniet e mira mes Rusisë e Turqisë janë në favor të Serbisë, thekson ai, duke shtuar se vizita e presidentit serb në Turqi, e më pas edhe në Rusi, është vazhdimësi e bashkëpunimit të mirë.

Ai shton se në kontekstin e zgjidhjes së çështjes së Kosovës duhet marrë parasysh edhe faktin se Turqia i ka “ftohur” raportet me Kosovën, e ka ndryshuar politikën sa i përket çështjes së Kosovës.

“Të gjitha këto janë sinjale të mira për pozitën tonë dhe betejën tonë që Kosova të mbetet pjesë e Serbisë. Ata e kanë njohur Kosovën si shtet të pavarur, por po ndjehet ky devijim si rezultat i zhvillimeve gjeopolitike në skenën ndërkombëtare”, ka thënë mes tjerash ai. /Lajmi.net/