Kandidati për deputet nga radhët e Aleancës, Burim Ramadani, ka reaguar ndaj gjetjeve të Raportit të Auditorit për Ministrinë e Mbrojtjes për vitin 2025, duke akuzuar Qeverinë për neglizhencë ndaj pjesëtarëve të Forcës së Sigurisë së Kosovës.

Përmes një postimi në Facebook, Ramadani ka thënë se siguria kombëtare duhet të jetë prioritet dhe jo, sipas tij, “lavdërimet nëpër media”.

Ai ka cituar një pjesë të raportit, ku thuhet se Ministria e Mbrojtjes ka kompensuar pjesëtarët e FSK-së për kujdestaritë vetëm për muajin janar të vitit 2025, ndërsa arsyeja e moskompensimit të plotë lidhet me mungesën e buxhetit.

“Ushtarët e Kosovës të lënë pas dore. Kjo nuk guxon të vazhdojë. Mjaft më! Siguria kombëtare duhet të jetë prioriteti, jo lavdërimet nëpër media”, ka shkruar Ramadani.

Sipas tij, gjetjet e Auditorit hedhin poshtë pretendimet për sukseset e qeverisjes në sektorin e mbrojtjes.

“Kur ushtari detyrohet ta padisë në Gjykatë Qeverinë, s’kemi çka flasim për çështje tjera. Viti 2025 i ka pasur 12 muaj, jo veç një muaj”, ka theksuar ai.

Ramadani ka kërkuar më shumë përkushtim institucional ndaj pjesëtarëve të FSK-së, duke vlerësuar se moskompensimi i tyre për punën e kryer është i papranueshëm dhe cenon dinjitetin e ushtarakëve të vendit. /Lajmi.net/