Sekretari i Përgjithshëm i AAK-së, Burim Ramandani thotë se FAK duhet të votohet nga kjo legjistlaturë, në të kundërtën, vlerëson ai, aprovimi i ndryshimeve kushtetuese për FAK-un do të mund të shtyheshin për së paku 7 vjet.

Në një intervistë për Interaktiv të KTV-së, Ramadani tha se AAK-ja e jep votën pro FAK-ut dhe se i mbetet koalicionit qeverisës që të sigurojë votat e minoriteteve.

“Besoj se prej informatave që i kemi marrë bëhet fjalë vetëm për ndryshimet kushtetuese për FAK dhe nuk bëhet fjalë për kërkesën e minoriteteve për vendet e rezervuara”.

“Në qasjen politike këto tema janë ndërlidhur, sepse për FAK duhet të jene dhe votat e deputetëve dhe besoj se i takon koalicionit qeverisës që të bëjë votat”.

“Ai sa herë ka thënë se i ka votat ka pasur parasysh votat e partisë së vetë dhe të minoriteteve”.

“I takon atij (kryeministrit Thaçi) që ti sigurojë votat e koalicionit të vet”.

“Është tepër me rëndësi për Kosovën krijimi i FAK-ut”.

“Normalisht që nëse nuk votohet për FAK-un, atëherë kjo çështje mund të shtyhet atëherë edhe për 7 vjet”.

Ramadani thotë se partitë politike kosovare duhet të jenë gjeneroze dhe të vazhdojnë vendet e rezervuara për minoritete edhe për një mandat, për hir të FAK-ut.

“Mendoj që partitë politike serioze duhet të shohin të gjitha alternativat që janë në tavolinë sepse është diçka që ekziston që është kërkesa e minoriteteve, që në praktikë i bie 3 deputetë më shumë të minoritetit serb, dhe duhet ta shohin nëse ajo është diçka e pakalueshme për krijimin e FAK, po ashtu duke e ditur rrezikun se në mandatin e ardhshëm gjasat do të jenë më të vogla për krijimin e FAK, për shkak të ndryshimeve që do të ketë në politikën e Kosovës”.

Duke folur për mënyrën se si vendi mund të shkojë në zgjedhje, me shpërndarjen e Parlamentit apo dhe mocionit të votëbesimit, Burim Ramadani tha se AAK do të votonte pro në të dyja rastet.

“Ne si AAK e besojmë se Kuvendi i Kosovës duhet ta ndëshkojë këtë qeveri, duke ju uruar rrugën e mbarë për një kohë të gjatë”.

 “Ne e kemi diskutuar edhe në organet e partisë dhe sjellja jonë ka qenë sjellje e përgjegjshme. Nëse shpërndajra e Kuvendit  do të vijë në rend dite në Kuvend, Aleanca do ta votojë”.

“Cilido variant që e bën shkëputjen e kësaj qeverisje ne e përkrahim.”

“Nëse kjo nuk ndodhë, atëherë bashkë me LDK dhe me Vetëvendosje do të arrijmë ta ndërtojmë mocionin e votëbesimit dhe ta qojmë vendin në zgjedhje”, tha Burim Ramandani për KTV.