Rama për rastin Doshi: Ta lëmë çështjen në dorë të drejtësisë

Kryeministri i Shqipërisë, Edi Rama nuk ka marrë pjesë në asnjë nga debatet që u zhvilluan brenda dyerve të Kuvendit sot, por thjesht ka qëndruar dhe ka dëgjuar akuzat që shpërthyen mes Sali Berishës dhe Ilir Metës.

Lajme

05/03/2015 17:08

Por, pas mbylljes së seancës së sotme, ai ka dhënë një prononcim të shkurtër për mediat, ku ka folur edhe për videon e Tom Doshit.

Kryeministri Rama tha se gjithë këtë çështje duhet lënë në dorë Prokurorisë që ta hetojë deri në fund.

“Ministri ynë i Brendshëm dje e tha shumë qartë dhe nuk ngriti akuza por çmontoi në mënyrë të plotë akuzën e ngritur. Dhe megjithëse në këtë farsë është përfshirë një tufë personazhesh, as ministri i Brendshëm dhe askush nga ne nuk synon të përfitojë për shkak të përkatësisë familjare apo politike të personazheve me PD-në me PR-në dhe me të gjithë sojin dhe sorollopin e një opozite që po tretet në llum, por përsëri t’ia lëmë Prokurorisë, t’ia lëmë hetimit deri në fund”, tha Rama.

Më tej ai akuzoi ish-kryeministrin Berisha se nuk ka gojë të flasë për krime e shantazhe pasi është ai që gjatë viteve të qeverisjes së tij e la 21 janarin pa përgjigje, duke i mbyllur gojën Prokurorisë. Rama shprehu shqetësimin që po krijon gjithë kjo situatë në sytë e partnerëve ndërkombëtarë.

“Besoj se sot ish kryeministri na dha hapur atë që në fakt ka qenë për të gjitha vitet e qeverisjes së tij; standardin, pra një njeri në krye të pushtetit që i mbyll gojën Prokurorisë dhe që ende sot e gjithë ditën ka lënë pa përgjigje 21 janarin, i takon Drejtësisë, Prokurorisë, i takon edhe gjithë procesit hetimor të zbardhë të vërtetën e kësaj farse që na turpëron të gjithëve, se merreni me mend se çfarë dëgjojnë e çfarë kuptojnë nga gjithë kjo marrëzi partnerët tanë ndërkombëtarë”, tha Edi Rama.