Kryetari i Prishtinës, Përparim Rama, ka reaguar pas mbylljes së përkohshme të qumështores “Vita”, duke ia atribuar këtë zhvillim politikave të Qeverisë së Kosovës dhe marrëdhënieve të saj me partnerët ndërkombëtarë.

Në një reagim publik, Rama tha se qytetarët po përballen me pasojat e qeverisjes aktuale, transmeton lajmi.net.

“Ky është bilanci i një politike që u shit si ‘patriotike’, por që sot po e paguajnë qytetarët e Kosovës. Bashkimi Evropian po ridrejton fondet drejt Shqipërisë, Malit të Zi dhe Maqedonisë së Veriut, ndërsa Kosova mbetet jashtë. Qeveria e Albin Kurtit na ka lënë nën masa ndëshkuese dhe larg partnerëve tanë”, ka shkruar Rama.

Ai u ndal edhe te rasti i qumështores “Vita”, duke thënë se pasojat po i bartin punëtorët, fermerët dhe bizneset.

“E kur flasim për pasojat, sot e pagoi fabrika e qumështit ‘Vita’. E pësuan punëtorët. E pësuan fermerët. E pësuan pronarët. Nesër kush?”, është shprehur ai.

Rama tha se Kosova po humb investime dhe vende pune, ndërsa kritikoi edhe qasjen e qeverisë ndaj zhvillimit ekonomik.

“Po humbim investime, po humbim vende pune, po humbim dinjitetin ekonomik të vendit. Ndërkohë, kjo qeveri po përpiqet t’i mbajë qytetarët peng të lëmoshave dhe premtimeve elektorale prej 100 eurosh, në vend që t’u krijojë mundësi për të jetuar me punën e tyre”, deklaroi Rama.

Në fund të reagimit të tij, kryetari i Prishtinës e cilësoi situatën si pasojë të një qeverisjeje që, sipas tij, është “autokrate, e paaftë dhe papunëtore”, duke e përmbyllur mesazhin me fjalën: “Mjerim!”./lajmi.net/