Dy persona janë shoqëruar në stacionin policor në Suharekë, pasi njëri prej tyre kishte publikuar në rrjetet sociale një fotografi me armë zjarri.

Rasti ka ndodhur më 7 tetor, rreth orës 10:30, në fshatin Krushic të Suharekës, sipas raportit 24-orësh të Policisë së Kosovës.

Sipas Policisë, pistoleta me gaz që lidhet me rastin i përkiste të dyshuarit tjetër. Arma është konfiskuar nga organet e rendit.

“Janë shoqëruar në stacionin policor dy të dyshuar meshkuj kosovarë, pasi që njëri kishte publikuar një foto me armë zjarri në rrjete sociale, ndërsa arma-pistoleta me gaz ishte e të dyshuarit tjetër”, thuhet në raportin e Policisë.

Me vendim të prokurorit, të dyshuarit janë liruar, ndërsa rasti do të vazhdojë në procedurë të rregullt. /Lajmi.net/