Prokuroria në Prishtinë jep detaje për agjencionin “BCD Travel” e cila po mashtron qytetarët me rezervime

10:05 | 9 Dhjetor 2021

Prokuroria Themelore në Prishtinë ka njoftuar qytetarët se agjencia “BCD Travel” që dikur kishte selinë në Bregun e Diellit, në kryeqytet tani është duke funksionuar online në rrjetet sociale, ku disa persona të dyshuar në bashkëkryerje po mashtrojnë qytetarët e Kosovës, por edhe të vendeve fqinjë me aranzhmane turistike për në Turqi, Dubai, Maldive, Egjipt, si dhe përmes shitjes së biletave të fluturimeve në vendet e Evropës.

“Ju njoftojmë se Prokuroria Themelore në Prishtinë, ka ndërmarrë veprime hetimore lidhur me këtë rast, ku dyshohet se ky grup i personave ka mashtruar qindra qytetarë të cilët kanë paguar shuma të konsiderueshme të parave, kinse për sigurimin e vizave në vendet evropiane, ashtu që prokurori i shtetit është duke vazhduar me trajtimin e rastit në fjalë dhe ndërmarrjes së veprimeve të tjera hetimore”, thuhet në njoftimin për media, transmeton lajmi.net.

Tutje është thënë se Prokurori i Shtetit është duke e trajtuar me përgjegjësi dhe profesionalizëm këtë rast dhe personat e përfshirë në kryerjen e veprave penale do të ndiqen penalisht, andaj u bëjmë thirrje të gjithë qytetarëve të cilët janë të dëmtuar nga ky agjencion turistik, të bashkëpunojnë me organet e rendit, pasi synimi kryesor është luftimi i suksesshëm i krimit dhe sigurimi i sundimit të ligjit, si dhe mos të bien pre e mashtrimeve të tilla./Lajmi.net/