Prokuroria Themelore në Mitrovicë ka kërkuar nga Gjykata Themelore në Mitrovicë caktimin e masës së paraburgimit ndaj tre personave të dyshuar për transportim të narkotikëve me qëllim të shitjes.

Sipas komunikatës së Prokurorisë, të dyshuarit me inicialet L.B., F.S. dhe L.S. dyshohet se në bashkëkryerje kanë kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

Ndërsa, F.S. dyshohet edhe për veprën penale “Posedimi i paautorizuar i narkotikëve, substancave psikotrope ose analoge”.

Rasti ka ndodhur më 11 gusht 2026, rreth orës 16:00, në rrugën magjistrale Prishtinë–Mitrovicë, në fshatin Pestovë të Vushtrrisë.

Sipas Prokurorisë, tre të dyshuarit po transportonin me dy automjete substancë narkotike të llojit marihuanë, me qëllim shitjeje.

“Tre (3) të pandehurit, me datë 11.08.2026 rreth orës 16:00 në rrugën magjistrale Prishtinë – Mitrovicë në fshatin Pestovë Komuna e Vushtrrisë, së bashku me dy automjetet e tyre pa autorizim kanë transportuar substanca narkotike të llojit marihuanë, me qellim shitje”, thuhet në komunikatën e Prokurorisë.

Sipas njoftimit, gjatë tentimit të policisë për t’i ndaluar, të dyshuarit kanë goditur policinë dhe më pas, në përpjekje për t’u larguar, kanë shkaktuar aksident.

“Të njëjtit gjatë tentimit të policisë për ti ndaluar në rreth rrotullimin e fshatit Pestovë, godasin policinë dhe në tentim për të ikur shkaktojnë vet aksident në fshatin Pestovë”, thuhet më tej në komunikatë.

Gjatë kontrollit të njërit prej automjeteve, policia ka gjetur një çantë brenda së cilës janë sekuestruar 3 kilogramë e 18 gramë marihuanë.

“Gjatë patrullimit të veturës gjendet një çantë brenda të cilës janë gjetur dhe sekuestruar tre kilogramë e tetëmbëdhjetë (3018) gramë substancë narkotike e llojit marihuanë e cila është sekuestruar”, njofton Prokuroria.

Seanca për caktimin e masës së paraburgimit pritet të mbahet para gjyqtarit të Procedurës Paraprake në Gjykatën Themelore në Mitrovicë. /Lajmi.net/