Prokuroria deklarohet për plagosjen e “Plakut të Bregut”: Janë duke u ndërmarrë të gjitha veprimet e nevojshme për identifikimin dhe arrestimin e personave të dyshuar

Lajme

15/05/2026 09:43

Prokuroria Themelore në Prishtinë ka dal me një njoftim sa i përket plagosjes së mbrëmshme në Prishtinë, në rrugën “Ali Sokoli”.

Në njoftimin e lëshuar, Prokuroria tregon se është iniciuar rasti në drejtim të veprës penale “Vrasje e rëndë në tentativë”, transmeton lajmi.net.

Tutje, në komunikatë thuhet se Prokurori i Shtetit është duke ndërmarrë vepriemt e nevojshme për identifikimin dhe arrestimin e personave të dyshuar.

Viktimë në këtë rast është 25-vjeçari, Harbin Vitia njohur ndryshe si “Plaku i Bregut”.

Komunikata e plotë:

KOMUNIKATË PËR MEDIA

Prishtinë, 15 maj 2026- Prokuroria Themelore në Prishtinë njofton opinionin publik, se pas pranimit të informatave nga Policia e Kosovës lidhur me një rast që ka ndodhur më datë 14.05.2026, rreth orës 21:40, në rrugën ‘’Ali Sokoli’’ në Prishtinë, një person me inicialet A.V. ka mbetur i plagosur si pasojë e plagëve të shkaktuara nga arma e zjarrit. I njëjti është dërguar për trajtim mjekësor në Qendrën Klinike Universitare të Kosovës (QKUK).

Prokurori kujdestar ka dalë në vendin e ngjarjes së bashku me Policinë e Kosovës, ndërsa me vendim të Prokurorit të Shtetit është iniciuar rast në drejtim të veprës penale ‘’Vrasja e rëndë në tentativë’’, sipas nenit 173 lidhur me nenin 28 të Kodit Penal të Republikës të Kosovës.

Prokurori i Shtetit, në bashkëpunim dhe koordinim me Policinë e Kosovës, është duke ndërmarrë të gjitha veprimet e nevojshme hetimore për ndriçimin e plotë të rrethanave të rastit, si dhe identifikimin dhe arrestimin e personave të dyshuar lidhur me këtë rast.

Prokuroria Themelore në Prishtinë, do të informojë opinionin publik për zhvillimet e mëtejme lidhur me këtë rast./lajmi.net/