Në bazën ushtarake “Halifax” Presidenti Thaçi është pritur me nderimet më të larta ushtarake, i përcjellë nga Admirali Craige Baines dhe është ftuar të bëjë inspektimin e Gardës së Nderit. Ky është nderi më i lartë ushtarak që u bëhet të ftuarve në këtë bazë ushtarake.

Pas ceremonisë ushtarake, Presidenti Thaçi është ftuar të vizitojë palestrën në të cilën në pranverën e vitit 1999 qenë strehuar qindra kosovarë të dëbuar nga Kosova nga forcat serbe. Admirali Baines u shpreh i kënaqur që Kanadaja ka qenë në gjendje që t’u dalë në ndihmë refugjatëve nga Kosova në vitin 1999.