Policia ndalon kontrabandimin e një sasie duhani të papërpunuar prej 800 kg

Policia e Kosovës, ka njoftuar se gjatë patrullimit ka ndaluar një furgon, i cili duke shfrytëzuar rrugët malore nga fshati Tanushë, Maqedoni e Veriut, ishte nisur në drejtim të Vitisë, dhe i njëjti ishte duke bërë transport të mallit që dyshohet të jetë i kontrabanduar.

Lajme

03/06/2022 14:02

Përmes një komunikate për media shtohet se, automjeti i ndaluar ka qenë me targa vendore dhe i drejtuar nga S.I mashkull kosovar, të cilit gjatë kontrollimit të automjetit transportues i janë hasur rreth 800 kg (36 paketime) duhan i papërpunuar, shkruan lajmi.net

“Njësia policore e Task Forcës, Drejtoria Rajonale e Policisë Kufitare Lindje, gjatë patrullimit, vëzhgimit dhe pritave të befasishme, ka arritur ta vërejë, ta përcjellë dhe ta ndalojë një kombi (furgon), i cili duke shfrytëzuar rrugët malore nga fshati Tanushë-Maqedoni e Veriut, duke kaluar përmes fshatit Mjak, ishte nisur në drejtim të Vitisë. Kështu, sot me datë 03.06.2022, rreth orës 10:00 edhe përkundër tentativës për të t’iu shmangur patrullës policore, automjeti është ndaluar në fshatin Ramjan të Vitisë. Automjeti i ndaluar, me targa vendore dhe i drejtuar nga: S.I., (viti i lindjes 1979, mashkull kosovar) ishte duke bërë transport të mallit që dyshohet të jetë i kontrabanduar. Gjatë kontrollit të automjetit transportues është hasur në rreth 800 kg. (36 paketime) duhan të papërpunuar”, thuhet në komunikatë për media.

Tutje shtohet se rasti është duke u trajtuar nga zyrtarë policorë dhe në koordinim me prokurorin kujdestar. Automjeti me mallin e ngarkuar do të dorëzohet në terminalin doganor tek Dogana e Kosovës. /Lajmi.net/