Deputeti Pal Lekaj ka kritikuar kryeministrin Albin Kurti për përdorimin e dialogut me Serbinë për qëllime elektorale.

Deputeti i Aleancës për Ardhmërinë e Kosovës (AAK), Pal Lekaj, ka thënë se kryeministri, Albin Kurti, është duke e përdorur dialogun për poena elektoral.

Sipas Lekajt, kushtet e vendosura nga Kurti për takim me presidentin serb, Aleksandër Vuçiq, janë legjitime, por joserioze, pasi pas dy ditësh zëvendëskryeministri Besnik Bislimi zhvilloi takim me palën serbe në Bruksel.

“Takimi i fundit në Bruksel, kur Kurit nuk takoi Vuçiqin. Atëherë lind pyetja pse je shku në Bruksel dhe ato tri kushte që i ka propozuar apo i ka kërkuar Kurti që të ulet në tavolinë, janë okej. Janë legjitime por ja që pas një jave ulet vartësi i tij. Dhe mendoj që është më tepër diçka që Kurit po e shfrytëzon dialogun për poena elektorale për votë dhe nuk është shumë serioz në kërkesa e tyre”,ka thënë Lekaj në “FIVE” të Dukagjinit.

Lekaj ka theksuar se kjo është “hajgarja” e radhës e Kurtit që po ua bën qytetarëve të vendit, teksa shton se edhe Bislimi nuk duhej të takohej me palën serbe pa u plotësuar ato.

“Sepse asnjë kuptim nuk e ka që pas dy ditëve që të ulet vartësi i tij që është zëvendëskryeministri Bislimi në Bruksel. Meqë janë kërkuar tri kushtet për të dialoguar…i deleguar i kryeministrit për dialog, është zoti Bislimi. Dhe tani shtrohet pyetja a është kjo hajgare e radhës me qytetarët e Kosovës, hajgare sepse nuk është serioz në kërkesat e tij. Nëse ti je kryeministër i një vendi, që me të drejt i ki shtruar kërkesat e tua që janë legjitime dhe pas dy ditësh ulesh në tavolinë, ku është serioziteti, as Bislimi nuk është dashur pa u plotësuar kushtet, përndryshe atëherë ka hyra në mal pa sopat…”, ka shtuar Lekaj.