Kryeministri në detyrë Albin Kurti ka përfunduar takimet konsultative me përfaqësues të partive politike të komuniteteve joshumicë, për konstituimin e Kuvendit dhe formimin e qeverisë, pas zgjedhjeve nacionale të 9 shkurtit.

Në njoftimin e lëshuar nga Qeveria thuhet se Kurti takimin e fundit e pati me kryetarin e Partisë së Ashkalinjëve për Integrim (PAI), Etem Arifi dhe deputetin e zgjedhur të komunitetit ashkali nga ky subjekt, Artan Asllani.

“Diskutuan rreth hapave përpara drejt formimit të institucioneve në legjislaturën e 9-të dhe për bashkëpunimin në këtë drejtim. U pajtuan mbi rëndësinë e konstituimit të kuvendit dhe formimit të qeverisë pa vonesa, si përgjigje ndaj vullnetit të qytetarëve për zhvillim dhe progres, të shprehur në zgjedhjet parlamentare të 9 shkurtit”, thuhet në njoftim.

Kurti për dy ditë me radhë ka zhvilluar takime konsultative me partitë e komuniteteve joshumicë në Kuvend.